پاکستان میں فٹبال کے حوالے سے ایک اچھی خبر سامنے آگئی

کراچی(مانیٹرنگ نیوز‘ ویب ڈیسک‘ صحافی ڈاٹ کام)پاکستان میں فٹبال کے حوالے سے ایک اچھی خبر سامنے آگئی، پی ایس ایل کی طرز پر ملک میں فٹبال لیگ کا انعقاد ہوگا، معروف غیرملکی فٹبالرزبھی پاکستان پہنچ کر ایکشن میں نظر آئیں گے۔مشہورپروفیشنل فٹبالر اورسابق قومی کپتان کلیم اللہ خان نے تصدیق کی ہے کہ اپنی طرزکی پہلی فٹبال لیگ کے انعقاد کے لیے انتظامات اور اقدامات کیے جا رہے ہیں۔ کلیم اللہ نے بتایا کہ لیگ کا انعقاد کراچی میں ہوگا، لیگ کے مقابلے پیپلزاسپورٹس کمپلیکس کے فٹبال اسٹیڈیم میں ہوں گے۔انگلش پریمیئر فٹبال لیگ میں فلہم کلب کی نمائندگی کرنے والے انگلش فٹبالر چارلس کائے بنیا سیمت دیگر مشہورغیرملکی کھلاڑیوں نے پاکستان آنے کی حامی بھرلی ہے، لیگ میں حصہ لینے کے لیے مزید غیرملکی فٹبالرز سے رابطوں کا سلسلہ جاری ہے اور اس ضمن میں مثبت پیش رفت متوقع ہے۔ایک سوال کے جواب میں کلیم اللہ نے کہاکہ انٹرنیشنل فٹبال لیگ کے حوالے سے جلد ہی کراچی میں پریس کانفرنس میں تفصیلات سامنے لائی جائیں گی،سابق قومی کپتان کا کہنا ہے کہ امید ہے کہ ملک میں فٹبال کے معاملات لیگ کے انعقاد میں رکاوٹ نہیں بنیں گے جبکہ عوامی کھیل کی بقا اور ترقی کے لیے بھرپور تعاون کی امید ہے۔

اس خبر پر اپنی رائے کا اظہار کریں

اپنا تبصرہ بھیجیں