چترال میں پہلے فائیو اسٹار سیاحتی ریزورٹ کا سنگ بنیاد رکھ دیا گیا!

چترال(مانیٹرنگ ڈیسک‘ویب ڈیسک‘صحافی ڈاٹ کام)صوبہ خیبر پختونخواہ میں سیاحوں کی جنت چترال میں اب تک کی سب سے بڑی سرمایہ کاری، 3 کروڑ ڈالرز کی لاگت سے تیار ہونے والے چترال کے پہلے فائیو اسٹار سیاحتی ریزورٹ کا سنگ بنیاد رکھ دیا گیا۔

آئی این پی کے مطابق وزیر اعظم کے معاون خصوصی زلفی بخاری نے چترال میں بی جان فائیو اسٹار ہوٹل کا سنگ بنیاد رکھ دیا، پاکستانی نژاد امریکی شہری انور امان ہوٹل انڈسٹری میں خطیر سرمایہ کاری کریں گے۔

معاون خصوصی زلفی بخاری نے سنگ بنیاد رکھنے کی تقریب سے خطاب کرتے ہوئے کہا کہ حکومت آنے کے بعد غیر ملکی سرمایہ کاری میں 206فیصد اضافہ ہوا، ہوٹل انڈسٹری میں بڑی سرمایہ کاری پر انور امان کے شکر گزار ہیں۔انہوں نے کہا کہ 5 ارب کی لاگت سے تعمیر ہوٹل چترال کی خوبصورتی میں اضافہ کرے گا،

80 بستروں پر مشتمل ہوٹل کی تعمیر سے مقامی لوگوں کے لیے روزگار پیدا ہوگا، شمالی علاقہ جات میں چترال سیاحت کے لیے بہترین مرکز بن جائے گا۔زلفی بخاری نے کہاکہ وزیر اعظم سے روزانہ سیاحت کے فروغ پر گفتگو ہوتی ہے، وزیر اعظم ملک میں سیاحتی سرگرمیوں میں تیزی چاہتے ہیں،

ہر صبح وزیر اعظم کا پیغام ملتا ہے آج سیاحتی شعبے سے متعلق کیا فیصلہ ہوا؟انہوں نے کہا کہ پاکستان میں پہلی بار حکومت نے سیاحتی پالیسی تشکیل دی ہے، پالیسی پر عملدر آمد کے لیے 10 سال کا ایکشن پلان تیار کیا ہے۔ ہم سیاحت میں بھارت اور ملائیشیا سے مقابلہ کریں گے

۔معاون خصوصی کا کہنا تھا کہ ملکی تاریخ میں پہلی بار برانڈ پاکستان لانچ کرنے جا رہے ہیں، پورے ملک کی سیاحت سے متعلق معلومات ایک ہی پورٹل پر ملے گی۔ وفاقی حکومت ہر صوبے میں سیاحتی زون بنانے جا رہی ہے۔ سیاحتی مقامات کی سیکیورٹی کے لیے ٹور ازم پولیس تشکیل دے رہے ہیں

۔انہوں نے مزید کہا کہ چترال کے عوام کی طرف سے سڑکوں کی تعمیرکی درخواستیں آئی ہیں انہوں نے چترال کے لوگوں کو خوشخبری دیتے ہوئے کہا کہ چترال تا شندور 150کلو میٹر روڈ پر کام جلد شروع ہوجائے گا۔

Sahafe.com

اس خبر پر اپنی رائے کا اظہار کریں

اپنا تبصرہ بھیجیں