عوام کو سستے داموں سبزیاں کیسے دی جائیں؟ عثمان بزدار نے انوکھا فارمولا نکال لیا!

لاہور(مانیٹرنگ ڈیسک‘ویب ڈیسک‘ صحافی ڈاٹ کام) وزیر اعلی پنجاب عثمان بزدار کی ہدایت پر صوبے کے عوام کو ریلیف دینے کا ایک اور بڑا قدم اٹھا لیا گیا۔آئی این پی کے مطابق پنجاب حکومت نے صوبے کے مختلف شہروں میں 32 ماڈل بازاروں میں کسان پلیٹ فارم قائم کر دیے جہاں کاشت کار اپنی اجناس براہ راست فروخت کر سکیں گے۔وزیر اعلی پنجاب نے ماڈل بازاروں میں کسان پلیٹ فارمز قائم کرنے کی ہدایت جاری کی تھی تاکہ کسان پلیٹ فارم پر کاشت کار اپنی اجناس براہ راست فروخت کر سکیں۔وزیر اعلی عثمان بزدار نے حکومتی اقدام کے بعد کہا ہے کہ کاشت کاروں کواپنی اجناس فروخت کرنے کے لیے جگہ بلا معاوضہ دی گئی ہے، لاہور ڈویژن میں 12 ماڈل بازاروں میں کسان پلیٹ فارمز قائم کیے گئے ہیں۔عثمان بزدار کا کہنا تھا کہ مہنگائی کا تدارک بھی اس قدم سے ممکن ہو سکے گا، کسان پلیٹ فارم کے ذریعے عوام کو سستے داموں سبزیاں دستیاب ہوں گی، ہم عوام کو ریلیف دینے کے تمام ضروری اقدامات کر رہے ہیں۔یاد رہے کہ گزشتہ ہفتے وزیر اعلی عثمان بزدار نے ڈیرہ غازی خان کے قبائلی علاقوں کو بجلی فراہم کرنے کی بڑی نوید سنا دی تھی، انھوں نے اعلان کیا تھا کہ قبائلی علاقوں کے لیے 132 کے وی کا علیحدہ گرڈ اسٹیشن بنے گا، اس منصوبے پرتقریبا ایک ارب روپے لاگت آئے گی۔

اس خبر پر اپنی رائے کا اظہار کریں

اپنا تبصرہ بھیجیں